Pawanka Fund apoia Programa Tara Bandu iha Posto Administrativo tolu: Zumalai, Suai no Tilomar, no dahuluk realiza ona iha Suco Labarai. Tema: "Tane A'as Kultura no Promove Lisan Tara Bandu iha Pratika ba Jestaun Rekursu Natureza hodi Minimiza Risku Dezastre ba Komunidade" — "Kultura mak ita-nia Identidade".
Katuas Lia Nain Suku Labarai, Xefe do Suku no APA Suai asina Lei/Regulamentu Tara Bandu, no Sr. PAM Covalima aprova. Autoridade munisípiu Covalima no reprezentante autoridade nasionál entrega simbolikamente sasan ne'ebé bandu ba makleat sira, lori ba tara iha baliza (fronteira) Suku Labarai no hatudu ba komunidade no públiku, hodi kumpri no hatene katak realiza ona Tara Bandu iha Suku Labarai.
Iha serimónia ne'e hetan partisipasaun husi Reprezentante Ministru Administrasaun Estatál, Diretór Jerál Dezenvolvimentu Lokál Sr. Virgílio da Costa, Prezidente Autoridade Munisipál Covalima Sr. Miguel Armada Cardoso, reprezentante Prezidente CMCLN Covalima, Lia Nain sira, Administradór Postu Suai, Maucatar no Lolotoe (Bobonaro), Komandante Eskuadra Suai no Lolotoe, Xefe Suku Labarai, Camenasa, Beco, Opa no Lupal, komunidade Labarai no estudante sira.
Media CJC
